Li pa twò ta!

M pa konnen si w remake rete mwens ke 3 mwa pou ane 2015 lan fini. Jou yo ap kouri, men yo pa janm rate menm yon minit, pou yo ba nou leson nou dwe aprann yo. L ap difisil pou m ta konnen kòman ane 2015 lan te ye pou ou ak kisa li sere pou ou pou dènye jou sa yo. Men sèl sa m konnen, nenpòt jan sa ta ye a li pa twò ta pou w aprann osnon kontinye aprann ou dwe premye priyorite nan lavi w. Jis paske, se sa w ap bezwen pou debloke tout lòt sa ki enpòtan nan lavi w yo.

ed

M pa gen kouraj ankò pou m esplike pèsonn, chèche konnen sa w ye, aksepte sa w ye,  e renmen sa w ye san w pa p chèche validasyon moun, se bay tèt ou priyorite e sa pa gen anyen pou wè ak egoyis. Aksepte tèt ou e renmen sa w jwenn ou ye a, se youn nan pi gwo travay w ap janm fè nan tout ekzistans ou. Lè m di w li pa twò ta a, li pa twò ta vre e li pa janm twò ta pou aprann fè sa. Se yon travay ki mande anpil kouraj, anpil pasyans, e se pa yon bagay k ap janm fini; e sa m pi renmen an, li se yon pasaj oblije si w vle grandi e konnen tout valè kapasite ou gen nan ou pou w ka rive amelyore lavi w toutbon vre.

Plis ou aksepte sa, plis w ap santi w byen pou w fè travay sa a. M gen kèk ti teknik m ap itilize jouk kounya a m vle pataje ak ou ki ka itil ou jan yo kontinye itil mwen an…

Kontinye li

Gen de jou pou sa!

Sa pa rive m fasil, men youn ou de fwa nan yon ane, mwen konn jis rete epi m santi m tris anpil anpil kote anyen pa gen sans pou mwen. Sa rive m yè. M poko janm ka rive esplike sa ki a la baz sa. Poutan sa ki pi difisil nan tout istwa a, se mwen tris, menm m pa konn sa ki fè m tris la. Sa vin mete m nan yon sitiyasyon kote m ap jije tèt mwen, erè mwen fè yo vin ap remonte nan lespri m e sa fè mwen santi m tèlman pa byen; se tankou yon moun ki malad. Men yè, m dekouvri yon gwo bagay. Mwen sezi wè, mwen pa t chèche anyen pou kouri dèyè tristès sa a pandan tout jounen an.

Screen Shot 2015-10-15 at 8.42.01 AM

Youn nan objektif mwen bay tèt mwen se ankouraje, felisite, pran swen tèt mwen. Mwen fè sakrifis chak jou pou m toujou rete konekte ak tout sa ki bon nan mwen. Chak jou ki pase, mwen efòse m pou m fè yon bagay piti kou l ye pou tèt mwen, paske m konnen se sèl sou mwen m ka konte nan fen jounen an. Malerezman jou tristès sa a anvayi m, m pa gen kouraj pou m fè youn nan sa m sot site anlè a. Nan moman sa yo, mwen se yon bèlnègès ki pa gen kouraj, ki pèdi, ki anvi fèmen tèt li yon kote pou l pa wè pèsonn.

Yè mwen aprann, mwen pa bezwen yon ewo chak jou. Mwen aprann pou m aksepte santi sa m pa vle santi a pou m ka tounen ak plis fòs. E se sa ki fè, mwen pa t kouri dèyè gwo vag tristès sa a ki te vlope m lan. Eske ou konnen, vilnerabilite ka youn nan pi gwo pouvwa ou genyen bèlnègès… Kontinye li

Gade w!!!

Byento, sa pral fè yon lane deja depi nou te pale sou tèm sa a: “Gade solèy la” nan yon spektak BN. Pa di m ou gentan bliye non. Paske mesaj spektak sa toujou daktyalite. Li toujou gen menm sans lan: Solèy la se ou. Ou ka mande tèt ou poukisa m vin sou sijè sa jodi a. repons lan senp, li enpòtan pou w gade w. Sa ap toujou enpòtan.

flowerpower

11 oktòb 2015, se  yon jou espesyal. 11 oktòb, se jounen entènasyonal tifi. Toupatou nan mond lan, toujou gen aktivite ki fèt sou sa. Ou ka wè achtag sa yo: #ParcequeJeSuisUneFille, #DayOfTheGirl #62MillionGirls elatriye. Yo tout se pou sansibilize sou enpòtans sa genyen pou envesti nan edikasyon tifi yo.

Ou ka di, atik sa pa konsène w paske w pa tifi. Eben m ap di w, kò w, laj ou ak anpil lòt endis ka montre ou pa tifi ankò men chak fanm gen yon tifi nan li. E se pou sa, v vle w sonje, menm si w ta prèske gen 100 tan, tifi ki nan ou a, je w dwe toujou ret fikse sou li. Poukisa? Se kesyon w sa w ap poze. Eben kite m esplike w… Kontinye li

Plis Sèvis!

Ou sonje jan ou te bezwen konnen ki kote w ka ale, pou w pale ak yon moun ki ka tande w aprè retrèt Nan Mwen an. Doktè Judite Blanc, ki se sikològ (ki te youn nan konferansye nan diskisyon nou te gen nan retrèt la) deside ede w. Li disponib pou l tande w lè w pito nan klinik li an.

judite

Non, se pa paske w fòl ki fè w ka al wè yon sikològ. Okontrè, si w pa vle pwoblèm toufe w, si w vle konn kòman ou ka pi byen nan kò w ak nan lespri w, mwen envite w, fè yon ti pase pou yon ti vizit. Men tout sèvis ou ka jwenn nan klinik li an… Kontinye li

Sispann kouri!

Two prese pa fè jou louvri. Pa di m ou pa konn tande osnon li pwovèb sa a. Pa di m tou, ou pa konn sa l vle di paske l esplike tèt li poukont li. Si w pa ta konnen tou, ou pa bezwen pè, w ap jwenn esplikasyon an pi devan. Ou byen li wi, twò prese pa fè jou louvri. Li pa fouti fè jou louvri vre non. Kite m esplike w poukisa.

tumblr_nu4543B99x1r9m8rao4_1280

Mwen sonje youn nan pi gwo evènman ki te make lavi m, se te lè m t a pral kominye. M te gen 8 an lè sa a. M te gentan wè kijan jou sa a te bèl lè timoun ki pi gran pase m, t ap kominye. Sa vle di, m te gentan ap imajine tou kijan pa m nan ta pral pase. Kijan tout moun nan lekòl la ak nan katye a ta pral fikse je sou mwen. Malgre sa, jou yo pa t kouri pou mwen.

Se menm jan an pou ou tou, pa panse kouri w pral kouri nan lavi a pral fè w rive vit osnon byen rive. Plis ou konprann sa pi bonè, se plis w ap gen plis konfyans nan wout ou gen pou fè nan lavi w yo… Kontinye li

Pa twonpe w…

Jodi a, m ta renmen w jis di m, si gendelè kesyon sa yo pa konn pase nan tèt ou, menm jan ak mwen. Ou pa janm mande tèt ou, kisa ki fè yon moun konnen lè yon lòt moun renmen l? Osnon kijan ou ka konnen ou renmen tèt toutbon?  Kijan ou ka bay tèt ou pi gwo prèv lanmou, menm si anpil kondisyon reyini pou w ta fè yon lòt chwa ?  Ki pi gwo prèv lanmou ou ka bay tèt ou lè w nan yon sitiyasyon ki difisil ?

emel

M nan wout, m ap chèche repons ak kesyon sa yo toujou. Men m konnen, sa pi fasil rive pou moun konfonn lanmou ak abitid akoz de atant ak presyon sosyete a. Osnon atant moun sa a poukont li konstwi anndan tèt li, ki pa gen anyen pou wè ak lanmou. Sa rive pou moun souvan konfonn lanmou ak sa lanmou pa ye. E se sa ki fè tou, petèt ou ka konnen yon moun tankou yon sè w, yon matant ou, manman w, ou menm oswa yon ti zanmi w ki viv sitiyasyon sa deja, nan chèche lanmou, ki rive bliye tèt li.

Jodi a, Emeline Michel di se pa vre. Si w bliye tèt ou, sa pa lanmou. Li chante nan bèl ti mizik sa a “lanmou pa malè, li pa mizè” e li mande w pou louvri je w. Ann al dekouvri ansanm bèl ti mizik lavi sa a, k ap defini sa lanmou ye pou mwen ak ou… Kontinye li

Fè l pou ou…

Sa gen kèk ane, mwen te konn pwodui yon magazin radyo ki te dire 40 minit, sou pwoblematik jenès ayisyèn lan sou yon radyo entènasyonal ki baze an Ayiti. Nan emisyon sa a, mwen te konn prezante tout inisyativ yon jèn pran osnon yo pran pou jènès la. Sa te pèmèt mwen rankontre anpil jèn gason ak jèn fanm ki gen anpil talan, asosiyasyon jèn ki chaje ak  pwojè ak potansyèl. Sipèvizè m yo, konn felisite m pou jan emisyon yo konn byen prepare. Men malgre felisitasyon yo, mwen te fatige.

dire

Mwen te fatige wè, jan strikti sosyal la monte a, menm ak tout talan, tout kapasite sa yo, yo p ap kite jèn sa yo pase pou yo reyalize sa yo vle reyalize a. Sa te kòmanse afekte mwen pèsonèlman. M te kòmanse pèdi motivasyon pou m fè emisyon sa a. Jouk yon jou, mwen t ap swiv pandan 6 mwa, yon gwoup jèn ki soti nan katye ki pi sansib yo. Jèn sa yo t ap resevwa yon fòmasyon sou metye manyèl. Se te yon òganizasyon entènasyonal ki te finanse pwojè a pou yo.

Gen youn nan yo, ki te di m yon pawòl ki te enspire m. Depi lè sa a, m chanje fason m wè bagay yo. Kite m rakonte w… Kontinye li

Pou OU!

Ou te mèt tande sa w tande, m renmen lè m jwenn yon pwodui ki mache pou mwen. Mwen aprann nan ta, kòm pa fasil aksepte nenpòt pwodui. Ou mèt tande pwodui sa a bon pou tout moun, kou l rive sou mwen, li di li p ap mache. Pa ekzanp “Eco Styler Gel”, se youn nan pi bon zanmi anpil fi ak cheve natirèl; mwen m sonje, m te achte 2 gwo bokal lè m te fenk koupe cheve m nan,( wi m te fè ava sou li 😛 ), 2, 3 semèn aprè, se bay mwen te bay yo.

mbengue1

Yo pa anpil, men jou m resi jwenn yon bon pwodui ki bon pou mwen, m tou kenbe l. Bon si pwodui sa a, pa chè menm, se paradi sou latè. Se vre, pi fò bon pwodui yo pa bon mache. Men gendelè tou, ou konn tonbe sou youn ki bon e ki pa chè, ou pa fouti pa fè yon ti danse 🙂 Eben, se sa ki rive m mwa sa a ki sot pase la. M jwenn 3 ti pwodui youn diferan de lòt, ki pa vann chè ditou, e m pa ka menm konpare pri yo ak jan yo efikas e jan yo reponn ak atant m te gen de yo a.

Youn ladan yo se pou figi, youn pou po, youn pou cheve. Kite m rakonte w… Kontinye li

Tanpri!!!

Jodi a, m gen yon gwo sèvis m ap mande w. M konnen ou apresye bèl travay e ou konnen sa ki bon. Tanpri bèl nègès, èske ou ka fè yon ti efò pou sipòte bèl travay sa a, e patisipe pou kreye yon bagay ki pi gwo pase ni mwen ni ou? Kite m ba w plis detay.

Copy of HealthyRootsGirls

Sa gen yon ti tan, Yelitsa Jean-Charles ki se yon etidyan ayisyèn-amerikèn k ap etidye Design nan lekòl Rhode Island, kontakte m pou l te mete m okouran de travay l ap fè ak yon pwojè li genyen ki rele “Healthy Roots”. Yelitsa ak tout ekip li a, deside kreye plizyè poupe ki sanble ak ni mwen ni ou (youn ladan yo se yon ayisyèn), epi yon liv istwa pou tifi ka aprann renmen tèt yo, jan yo ye a. Mwen te kontan dekouvri yon tèl inisyativ. Si menm jan ak mwen, sa enpòtan anpil pou ou, pou pitit fi w, yon ti sè w, ti kouzin ou elatriye, rive wè tèt yo nan jwèt y ap itilize ak nan listwa y ap li,  tanpri pa ezite ede l reyalize rèv sa a.

Men kòman w ka fè sa… Kontinye li

Swiv zanmi’w Bèlnègès

Tumblr Logo

Fotochout/Konsepsyon BELNEGES

Belneges sou Youtube

Facebook