Si m di w, m konprann premye pawòl ki di nan bèl ti mizik sa a, se manti. Se vre nou tout pale Kreyòl, men Kreyòl Ayisyen pa menm ak Kreyòl Gwadloupeyen. E se sa ki fè, lè m te fenk tande l, mwen pa t twò fin konprann premye pawòl Misie Sadik ap di nan mizik sa a ki rele “Pa Lage”.

misie-sadik

Sèl sa m ka di w, premye fwa mwen te tande mizik sa a, li te ale dwat nan fon kè m. Paske kou l te rive nan refren an, mwen te santi lespwa. E se pa lespwa pou m manje, ni pou m achte rad ak telefòn non, men pito yon lespwa pou m amelyore lavi m. Pou m chèche limyè sa a ki anndan m nan. Vini w al tande pou w wè…

Gen anpil mizik ki vle bay lespwa, men se premye fwa m santi se mwen ki sèl espwa lavi m nan yon mizik ki fèt an Kreyòl nan nivo mwen santi sa a, lè m ap tande mizik sa a. E se sa ki fè, m pa bezwen konn rès pawòl yo, paske se limyè sa a m ap chèche. Limyè ki pa bezwen validasyon moun nan, limyè ki pap chèche konpetisyon an, limyè ki vle m grandi an, limyè ki fè m renmen moun mwen ye a, e pèmèt mwen wè limyè lòt moun ki nan antouraj mwen.

Mwen espere ti mizik sa a, ap raple w limyè ou ye jodi a!

PS: M renmen koral la nan fen an anpil!

Comments

comments