Swen Cheve Natirèl

Se pa w li ye…

Depi lè nou te lanse pwojè BN nan sou entènèt, sa gen plis pase 2 zan, rive jouk jounen jodi a, nou kontinye resevwa kesyon sou cheve natirèl. Nou apresye sa anpil e kite nou di w, ou ka toujou kontinye voye yo. Men nou jis vle raple w, nou pa espesyalis nan domèn sa a. Nou jis ap kontinye pataje ak ou, eksperyans nou, sa nou viv, sa nou aprann nan wout pou aksepte e renmen cheve nou.

ha

E, menm si nou ta espesyalis nan domèn cheve natirèl, sa te ka rive pou sa ki mache pou nou yo, pa mache pou ou. Souvan, nou jwenn anpil kesyon sou kòman m ka fè cheve m boukle? Osnon, kòman m ka fè cheve m kanpe menm jan ak cheve entèl? Sa m ka fè pou m fè cheve m pouse pi vit? Kesyon sa yo konn difisil anpil pou nou reponn ou. Paske si gen yon moun ki ta dwe konn sa cheve w ka fè ak sa li pa ka fè, nou panse se ta dwe ou menm avan tout lòt moun.

Poukisa li enpòtan anpil, pou bay plis valè ak eksperyans w ap fè ak cheve w la, olye ou ta renmen l tounen sa l pa ye… Kontinye li

BA YO FOS!

Menm lè m te gen pèmanant nan tèt mwen, objektif mwen se te toujou pou cheve m te an sante. Paske m renmen lè cheve a gen anpil volim. Eben sa pa chanje depi lè mwen deside pran swen bèl cheve natirèl mwen yo. Se vre, mwen gen cheve ki gen fòs e ki founi natirèlman. Men sa rive m souvan, pou m remake yo pèdi fòs yo, sitou nan semèn aprè lè m retire très ladan yo.

yariz

M pa kache di w, mwen pa renmen lè yo nan eta sa a. Paske ou wè yo pèdi briyans yo, yo pi fasil pou kase e yo manke founi.  Men si w fèt ak cheve ki gen aspè ki pa founi deja. Sa w ka fè?

Resèt la pa chanje. Rezilta yo efikas. Kite m pataje l ak ou… Kontinye li

D: DEMELE KE POZE!

Mwen renmen cheve m, paske li se pa m, e mwen aksepte l jan l ye a. Men mwen damou l, paske chak jou li kontinye ap aprann mwen jan pasyans, dwe gen anpil valè nan lavi m. Mwen kontan kontinye fè eksperyans ak li e aprann leson ki pa gen anyen pou wè ak cheve m, nan pran swen yo chak fwa, nan lavi m.

lianne1

Jan mwen te di l nan pòs sa a sou Facebook, cheve se yon ti detay nan lavi yon moun. Men, pou l tounen ti detay sa a, nan tèt nou menm fi, nou dwe pase tès l ap pase nou yo avan. Paske yo aprann nou, pou nou gen yon rapò emosyonèl a chak ti pati nan kò nou. Si yon grenn bouton leve nan figi nou la a, tèt nou cho. Cheve nou rache pandan n ap lave l, nou santi lavi nou prèske fini. Mwen te la a tou, nan menm enpas sa a. Men mwen fini pa aprann, tank mwen jwenn teknik ki ka ede m pran swen sa ki pou mwen pi fasil, se plis sa tounen yon konpòtman otomatik lakay mwen.

Se youn nan rezon ki fè, mete sou eksperyans nou, nou kontinye fè rechèch pou pataje tout astis ki ka ede w pran swen sa ki pou ou; men tou kontinye akonpanye w pou rive nan etap nou te site anwo a.

E kwè m, jou w konn ti teknik sa a nou pral pataje ak ou la a, pou demele cheve w. Ou pap mande rete… Kontinye li

CH: CHALE PA LADANN!

Jodi a, se lèt “CH”, n ap prezante w nan ribrik ABC cheve natirèl la. Chalè se youn nan pi gwo koz ki ka fè cheve yon moun pa an sante. Si cheve a souvan ekspoze nan solèy osnon si w itilize twòp chalè ak yon tanperati ki wo anpil, cheve w te mèt te an sante, gen anpil chans pou yo gen pwoblèm aprè.

Screen Shot 2015-04-24 at 7.00.16 PM

Si cheve a souvan an kontak ak chalè, sa ka kase l, li ka pèdi idratasyon l, sa ki ap lakoz li kase souvan bout pa bout. Nan atik sa a, nou te esplike yon altènativ ki senp e byen fasil, pou si w ta vle detire cheve w san w pa ba l chalè. Jodi a, n ap wè pito ki altènativ ki genyen pou w pwoteje cheve w, si w ta vle repase l osnon blo l. Paske wi, sa ka rive. Ou ka anvi cheve w byen detire e sa pa chanje anyen, cheve w toujou natirèl.

Men 3 konsèy ki ka itil ou… Kontinye li

Swiv zanmi’w Bèlnègès
Tumblr Logo
Fotochout/Konsepsyon BELNEGES
Belneges sou Youtube
Facebook