Bote ANNDAN

Pi bèl envestisman…

Avan, mwen te konn mande tèt mwen, eske peryòd 2o tan +, se pa peryòd ki gen plis obstak nan lavi yon moun? Lè m kòmanse pale ak moun ki lontan pi gran pase m, ki nan 50 tan +, yo tanmen rakonte m, eprèv y ap fè fas jouk kounya a, m vin dakò, eprèv se youn nan  prensip lavi a. E, si w pa fè lapè ak sa depi kounya a, l ap pi difisil pou fè fas kare ak yo pi devan.

wya

Mwen, m ret  kwè  pa gen yon peryòd nan lavi m ki pi difisil pase 2 dènye ane sa yo 2013-2015. Difisil ka twò fèb kòm kalifikatif si m ta pran pou m rakonte w jan chak jou, se eprèv k ap leve m, se yo k mennen m al dòmi 🙂 Se leson aprè leson, lavi a kontinye ap ban mwen pandan 2 dènye ane sa yo. Kòmanse nan relasyon fanmi, pase pran relasyon lanmou, zanmitay rive nan eprèv pou m konn kiyès mwen ye. Leson tout kote. M pa di w sa, paske  m sou plenyen non. M pataje sa ak ou, jis paske m vle raple w, peryòd sa yo itil pou w grandi, pou w tounen moun ou vle ye toutbon an.

Men pandan tout tan sa yo, nan mitan tout leson sa yo, ou dwe toujou pran swen tèt ou. Sa kapital. Eskize m, men ann deja klè sou sa, pran swen tèt ou a pa vle di sèlman lave cheve w, al nan stidyo fè zong elatriye. Pran swen tèt ou, ale pi lwen pase sa. Kite m pataje ak ou, 4 ti abitid ki ede m nan peryòd eprèv sa yo… Kontinye li

Ba l chans li!

Pa gen anyen ki di moun ou ye jodi a se sa w ye andann w vre. Mèwi. Ou sezi ? Ou ka pa dakò wi. Men sa pa fè anyen paske ou ka ban mwen rezon pi devan. Anpil fwa nou tèlman swiv tout sa yo ba nou, yo aprann nou, yomontre nou san nou pa kesyone yo, nou pa janm gen chans dekouvri tèt nou toutbon. Tout sa nou fè, nou fè l pou manman n, pou papa n, pou pwofesè n, pou zanmi n, pou vwazen an, ak pou sosyete a elatriye…

ana1

Depi tou piti, nou leve nou jwenn yon seri prensip ki di men kijan lavi a ye osinon men kijan lavi nou dwe ye. Yon seri wout tou dwat ki di men kijan pou n viv, men kijan n dwe wè kèk bagay, men sa ki bon ak sa ki pa bon. Yon sistèm ki pa ta gen pwoblèm non, si l te ba nou kote pou nou defini sa nou ye. Men sa ki pase, nan yon sistèm kote tout bagay gentan tou fèt, moun nou ye tout bon an gen anpil chans pou l pa janm parèt. Menm jan an tou, gen nan nou ki moun nou ye a paske nou nan yon gwoup, paske nou te rankontre yon kategori moun byen espesifik. Oubyen tou, gen nan nou ki ap chache tounen yon moun nou pa ye toutbon jis pou nou fè moun nan antouraj nou plezi. Eske w konnen konpòtman sa a, se youn nan konpòtman ki siman pral fè w fè bak sou wout pou konn ki moun ou ye a?

Ou vle konn poukisa, pa vre?… Kontinye li

Ak kiyès w ap mache?

Dènyeman an, m chita, m ap poze tèt mwen anpil kesyon. M ap mande m, poukisa depi tou piti pa ekzanp manman nou se ak tifi li plis vle nou jwe. Lè nou kòmanse gen lespri, anpil nan nou fè baz fi ansanm nan lekòl nou. Menm sou katye bò lakay nou pi souvan, se ak tifi parèy nou, nou toujou ap pale, al nan dlo, al nan mache, mennen tout lòt aktivite nou ansanm. Men, kou nou kòmanse gran, nou vin jèn fi, bagay la chanje?

yay

Nan reflechi konsa, mwen al fè yon ti rechèch sou sa, e mwen vin wè se lespri konpetisyon yo mete nan tèt nou an, ki anvayi sosyete n ap viv ladann nan, ki plis priyorize bezwen ak konfò gason yo (sosyete machis), ki youn nan prensipal koz divizyon sa a. Sa k pase a se, depi nou kòmanse demwazèl, bèl dinamik sa a ke nou te konn genyen lè nou te pi piti a,vin kraze; paske nou youn ap chèche pi bon  ke lòt olye pou nou bon ansanm. Se vre kounya a, w ap wè gen an pakèt fi k ap fè efò pou youn soutni lòt, pou youn travay ak lòt elatriye… Men an menm tan tou, nan lavi detoulèjou, rive zanmi, travay, gen sipò san konpetisyon, pataje rèv ak yon lòt fi parèy nou, poko ka reyalite anpil jèn fi, nan plizyè relasyon mwen obsève.

Sa k fè sa daprè ou? Repons lan senp. Kite m pataje l ak ou… Kontinye li

Pa janm limite tèt ou!

Anpil fwa, nou bay tèt nou objektif. Kiyès nan nou ki pa janm di pa egzanp : m vle gen yon metriz, yon pitit osnon yon lòt bagay kèlkonk ? Men sa k konn rive nan objektif sa yo, gen kèk fwa tou, nou tou di men ki kote n ap rive, men ki kote nou p ap ka rive. Sa tou ranmase lavi nou, mete l nan yon ti panye. Sa k di a, kèk nan nou pa janm rive soti ladan. Kite m rakonte w yon ti eksperyans m viv sa poko gen 2 mwa. Konsa, w ap konprann kijan sa enpòtan pou w pa janm bay tèt ou limit.

mandal

Mwen te gen yon travay pou m fè. Se te yon bagay m ta pral fè pou premye fwa. E li pa t fasil ditou. Paske m te gen pou m li plis pase 200 tèks nan lang anglè. M pa kache di w, sa te strese m anpil. Pou plizyè rezon. Tèks yo te anpil. M te plen lòt bagay pou m jere. Epi m te doute yon ti kras sou nivo anglè m. Men sa m pi sonje, se di m t ap di tèt mwen : pou di w ap kapab ?

Nan moman konsa dout ak konfizyon, ou se premye moun pou w konte sou li… Kontinye li

Swiv zanmi’w Bèlnègès
Tumblr Logo
Fotochout/Konsepsyon BELNEGES
Belneges sou Youtube
Facebook