Amelyore Lavi w

Kraze sa!

Sa rive w deja pou w poze tèt ou kesyon, poukisa pi gwo jouman/fawouch nan kilti nou gen rapò ak fanm, sitou kò fanm? Li trè difisil pou w tande yon betiz pou l pa gen yon bagay pou wè ak fanm ladann. W ap toujou tande yon ‘manman’, yon ‘bouda’ nan jouman an pou m site sa yo sèlman. Sa w panse ki kache dèyè sa?

ed

Nou te ka kòmanse site anpil rezon ki lakòz sa, men rezon ki plis entèrese nou jodi a se rann nou kont ke stati yon tifi osnon yon jèn fanm an ayiti chaje ak lawont, laperèz ak anpil entèdiksyon. Pa ekzanp, li fasil pou tande yo joure yon fi ki pa vle pran anyen nan men yon gason, ‘ti sina’. Pa paske li jis pa vle pran l non, men paske si li te ‘fanm’ tout bon- nan jan nou defini fanm ki la pou bay gason plezi avan tout lòt bagay la- lè li fin gen relasyon ak gason an, fòk gason an ta peye l. Mantalite sa a kontinye fè gwo dega ni nan tèt tifi ni nan tèt ti gason san nou pa janm rann nou kont de sa ni kanpe pou n di petèt gen yon lòt jan sa ta dwe fèt. Kontinye li

Pa kite yo defini l nan plas ou

Li nòmal si fason w defini reyisit la se pa konsa yon lòt moun wè l. Reyisit se yon bagay ki trè pèsonèl menm si sosyete n ap evolye ladann nan vle fè nou kwè se nan yon sèl wout pou tout moun pase pou yo reyisi, e si yon moun pa ta pase nan wout sa a, nou konsidere l tankou yon pa itil. Pa ekzanp, reyisit nan mantalite ayisyèn vle di pi souvan se gen byen materyèl tankou machin, kay, tè, dènye mak telefòn elatriye…, osinon se tounen yon moun ki popilè, ki chaje kontak (menm si moun sa a pa ta menm konn tèt li).

art1

Poutan pou jèn fi k ap evolye nan sosyete ayisyèn nan, reyisit la charye yon pi gwo chay dèyè l. Kontinye li

Nan ki etap ou ye?

Sa twò bèl lè w pran swen sa ki pou ou. Se vre li pi bèl lè w konsyan ke pran swen kò w ak pwodui ki natirèl e k ap bon pou sante w se yon pi bon envestisman. Lè w pi alèz nan kò w kit ou gwo kit ou mèg, kit ou klè ou po w fonse, lè w ou pa bezwen nan kategori bote sosyete a aksepte a pou w santi w bèl, se ka youn nan pi bèl filing ki ekziste. Men aprè, sa w genyen pou w ofri? Ki relasyon w ak tèt ou, rèv ou vle reyalize yo? Kòman w wè moun ki bò kote w, ki relasyon w ak fi parèy ou? Mwen rete kwè, ou deja konprann cheve natirèl pou kont li p ap ka fè w tounen bèlnègès ou vle ye a.

sol1

Filozofi BN nan menm nan esans li se bote anndan kou deyò. Gen yon rezon bote anndan an vin avan bote deyò a, Kontinye li

Sispann fè l pou moun!

Kit li se lekòl, nan legliz, nan travay elatriye, plizyè moun toujou ap chèche fè m konprann lè m abiye “nenpòt jan l ta ye a” se pou m fè moun plezi osnon se paske m vle atire gason ki fè m abiye konsa. Se ka yon senp kòmantè osnon yon blag pou kèk moun, men fason panse sa a ka gen anpil enpak negatif pita sou jan yon tifi oson yon jèn fanm ka wè tèt li e alèz nan kò l.

Screen Shot 2015-11-09 at 12.38.55 PM

Se yon bagay depi tou piti ki toujou atire atansyon m. Poukisa nou kwè nan kilti nou pa bò isit depi yon fi abiye, sitou si li abiye yon jan seksi se pou bay gason jòf? Nou kontinye nouri fason panse sa a chak jou nan tèt tifi ak jèn fanm nan peyi Dayiti ki bay anpil rezilta ki pa toujou nan avantaj nou. Yon bò, jounen jodi a nou kontinye gen rezilta negatif sa a, kote yon pil ak yon pakèt jèn moun (sitou fanm) ki manke osnon pa gen konfyans nan tèt yo ditou e k ap tann validasyon moun akoz de sa moun panse e ka wè de yo. Yon lòt bò, sa kontinye trennen dèyè l fenomèn asèlman (nan lari, seksyèl elatriye…) ki fè yon gason ka pèmèt li fè nenpòt kòmantè sou kò ak kòman yon fi abiye paske pou li se konpliman li fè fi a. Mete sou sa, sa vin ogmante ensekirite lakay anpil fi ki santi yo otomatikman an konpetisyon ak yon lòt pou yon bagay osi san enpòtans ki se rad ak abiman ak karaktè fizik youn ki diferan de lòt.

Poutan bèlnègès, ti travay pèsonèl ou dwe fè ak tèt ou pou w pa pran nan pyèj sa a senp. Kite m ba w kèk endis ki ka ede w wè pi klè… Kontinye li

Swiv zanmi’w Bèlnègès
Tumblr Logo
Fotochout/Konsepsyon BELNEGES
Belneges sou Youtube
Facebook