BEL TI MIZIK

Gen de jou pou sa!

Sa pa rive m fasil, men youn ou de fwa nan yon ane, mwen konn jis rete epi m santi m tris anpil anpil kote anyen pa gen sans pou mwen. Sa rive m yè. M poko janm ka rive esplike sa ki a la baz sa. Poutan sa ki pi difisil nan tout istwa a, se mwen tris, menm m pa konn sa ki fè m tris la. Sa vin mete m nan yon sitiyasyon kote m ap jije tèt mwen, erè mwen fè yo vin ap remonte nan lespri m e sa fè mwen santi m tèlman pa byen; se tankou yon moun ki malad. Men yè, m dekouvri yon gwo bagay. Mwen sezi wè, mwen pa t chèche anyen pou kouri dèyè tristès sa a pandan tout jounen an.

Screen Shot 2015-10-15 at 8.42.01 AM

Youn nan objektif mwen bay tèt mwen se ankouraje, felisite, pran swen tèt mwen. Mwen fè sakrifis chak jou pou m toujou rete konekte ak tout sa ki bon nan mwen. Chak jou ki pase, mwen efòse m pou m fè yon bagay piti kou l ye pou tèt mwen, paske m konnen se sèl sou mwen m ka konte nan fen jounen an. Malerezman jou tristès sa a anvayi m, m pa gen kouraj pou m fè youn nan sa m sot site anlè a. Nan moman sa yo, mwen se yon bèlnègès ki pa gen kouraj, ki pèdi, ki anvi fèmen tèt li yon kote pou l pa wè pèsonn.

Yè mwen aprann, mwen pa bezwen yon ewo chak jou. Mwen aprann pou m aksepte santi sa m pa vle santi a pou m ka tounen ak plis fòs. E se sa ki fè, mwen pa t kouri dèyè gwo vag tristès sa a ki te vlope m lan. Eske ou konnen, vilnerabilite ka youn nan pi gwo pouvwa ou genyen bèlnègès… Kontinye li

Pa twonpe w…

Jodi a, m ta renmen w jis di m, si gendelè kesyon sa yo pa konn pase nan tèt ou, menm jan ak mwen. Ou pa janm mande tèt ou, kisa ki fè yon moun konnen lè yon lòt moun renmen l? Osnon kijan ou ka konnen ou renmen tèt toutbon?  Kijan ou ka bay tèt ou pi gwo prèv lanmou, menm si anpil kondisyon reyini pou w ta fè yon lòt chwa ?  Ki pi gwo prèv lanmou ou ka bay tèt ou lè w nan yon sitiyasyon ki difisil ?

emel

M nan wout, m ap chèche repons ak kesyon sa yo toujou. Men m konnen, sa pi fasil rive pou moun konfonn lanmou ak abitid akoz de atant ak presyon sosyete a. Osnon atant moun sa a poukont li konstwi anndan tèt li, ki pa gen anyen pou wè ak lanmou. Sa rive pou moun souvan konfonn lanmou ak sa lanmou pa ye. E se sa ki fè tou, petèt ou ka konnen yon moun tankou yon sè w, yon matant ou, manman w, ou menm oswa yon ti zanmi w ki viv sitiyasyon sa deja, nan chèche lanmou, ki rive bliye tèt li.

Jodi a, Emeline Michel di se pa vre. Si w bliye tèt ou, sa pa lanmou. Li chante nan bèl ti mizik sa a “lanmou pa malè, li pa mizè” e li mande w pou louvri je w. Ann al dekouvri ansanm bèl ti mizik lavi sa a, k ap defini sa lanmou ye pou mwen ak ou… Kontinye li

Nou nan menm wout la!

M pa konn si sa konn rive w, men gendelè mwen konn nan mitan yon eprèv osnon yon pwoblèm, epi mwen di tèt mwen pa gen moun ki janm gen tèt chaje sa yo nan lavi yo, pou tèlman sa konn parèt san solisyon. Sa konn fè m pi tris e pi difisil pou reflechi ak sa m pral fè, pou m sot nan pwoblèm nan.

Glass-Ceiling-970x545

Men sa gen kèk tan, mwen deside di tèt mwen, se manti. Se pa vre, sa m ap di a. Konpòtman sa a ki vle fè m konprann se mwen sèl ki gen gwosè pwoblèm sa a. M di tèt mwen, panse konsa, sa p ap itil mwen nan anyen. Sa pa t fasil okòmansman pou m te rive aksepte sa. Men gras ak 3 medam sa yo ki chnate bèl mizik lavi, mwen vin konprann, se pa vre, mwen pa poukont mwen vre. Gen lòt fi menm jan ak mwen e ki sanble m, ki te pase la tou.

Ou p ap kwè m, men w ap sezi wè ki efè pozitif ti konpòtaman sa a m ap eseye devlope a, genyen sou mwen pou m soti nan enpas sa yo. Kite m prezante w 3 medam sa yo ak youn nan mizik yo chante ki plis make m… Kontinye li

SE POU BYEN W!

Se pa premye fwa, ou tande m ap rakonte w, si se pa t mizik, gendelè lavi m t ap san sans. Bon fraz sa a, yon ti kras sonnen twò kliche, men kite m jis di w, pa gen yon lè mwen vle santi m byen osnon mwen ta vle reyalize yon bagay pou pa gen yon mizik ki akonpanye m.

ibeyipress

E si se pa mizik, aprè eksperyans mwen anba dekonb aprè tranbleman dtè a, mwen te ka fou ak 2 wòch. Kote wè m ap di w m renmen tande mizik la, se pa tout mwen tande. Si yon mizik pa ale ak moun mwen vle ye a, osnon emosyon mwen santi nan moman an, mwen p ap tande l. Epi, youn nan abitid m kòmanse bay tèt mwen, se sispann tande mizik popilè komèsyal, yo pase nan tout radyo ak televizyon pa bò isit. Pa paske yo pa bon non, paske m pa jwenn anyen ladan yo ankò.

Se nan chèche nouvo bèl mizik, mwen tonbe sou 5 grenn bèl mizik sa yo. Vin al apresye yo ak mwen… Kontinye li

FOK OU JWENN SEKRE W LA!

Sitwon gen vitamin C, ni zoranj tou epi m byen kwè seriz  gen vitamin C tou. Men èske sa vle di yo se menm fwi pou sa? Lè w anvi bwè ji zoranj, si yo ta ba w bwè ji seriz èske w t ap satisfè ?

ana1

Se yon konparezon m ap eseye fè wi, m pako menm sèten l bon, men m ap eseye mande tèt mwen, si gen 2 bagay oswa gen 2 moun ki nan menm kategori, yo paka pran youn pou lòt paske chak gen espesifisite pa yo. Chak gen sekrè pa yo. M nan lojik sa pou m pale de yon ti mizik ki t ap mennen sa gen yon bon ti tan epi m kwè si yo tanmen repase l, l ap re mennen menm jan ak lè l te alamòd la sa gen 3 oubyen 4 lane konsa.

Ann al reviv yon bèl moman ansanm…  Kontinye li

AN AVAN!

Nan sa ki gen pou wè ak mizik, m rive nan yon nivo kote m santi mizik angllobe tout lavi m. M pa ka viv san li, bon m te ka menm di w menm se mòd m ap viv menm; se mwayen pou m eksprime m, se nan mizik m konn kisa pou m di epi kijan pou m di sa m ap di a. Wi, mwen se yon gwo fanatik mizik, m santi l nan nanm mwen e se pa pou ryen mwen se etidyan mizik nan Enarts (Ecole nationale des arts). Men, se pa sèlman mwen ki konsa, gen lòt moun, gen anpil lòt fi ki konsa tou.

sarah-vaughan-1

Nan tout estil mizik tankou konpa, rege, mizik rasin, zouk, soul, blues elt… yo chak la gen yon rezon ki fè yo la, ki defini yo byen espesifikman. Nan gwoup estil mizik sa yo, gen sa ki rele mizik angaje yo, sa vle di mizik pou moun esprime youn ou plizyè bagay ki pa fè yo byen. Mizik sa yo la pou yo denonse yon sitiyasyon osnon yon tretman, yon konpòtman ki pa ta dwe konsa. sa ki bèl la, sè ke nan tout estil mizik nou sot site la yo, yon atis ka fè santiman sa yo pase, paske nan jan de mizik angaje yo, pawòl mizik yo se youn nan pi gwo zam yo.

Mizik sa yo antre nan dinamik sosyete yo, se tankou chak mizik yon atis soti, li patisipe nan poze baz sosyete a osnon redefini l. Men, gen yon bagay m remake nan jan yo prezante istwa mizik angaje yo. Yo pa fasil pale de fanm kòm moun ki fè mizik angaje tou, yo souvan neglije valè mizik fanm sila yo menm jan yo fèl nan anpil lòt domèn ankò. Eske se paske fanm yo pa t patisipe nan menm mezi ak gason nan fè mizik sa yo ki fè sa? Sa te pote m reflechi e fè m fè anpil rechèch dènyeman an.

Kite m pataje kèk nan sa m te jwenn yo ak ou… Kontinye li

SA W PANSE?

Lè moun ap fè lasyans, youn nan jan yo fè ranmasay pawòl, pou yo konn opinyon divès kalte moun sou yon koze, rele “Ankèt”. Menwi, ou kab wè yon ekip moun oswa yon grenn moun ba w yon papye ki chaje kesyon pou w reponn, tout gen rapò ak yon sèl koze e pou yo wè si w ap bay laverite, yo konn vire yon sèl kesyon plizyè fason epi yo repoze w li. Men tou, sa ka rive se pat sou papye w ap reponn yo tou, se te kapab konsa moun nan rete li poze w divès kesyon sa yo. Antouka, gen yon bagay ki te atire atansyon m semèn sa a e kòm m konnen se yon sijè k ap taye banda pa bò isit, m di tèt mwen pa pito m mennen yon ti ankèt pou m wè kijan kèk moun rive abòde koze a. M fè sa vre wi.

ou la

Gen yon dam ki gen pitit fi li ki marye ak yon nèg, misye pran plezi l ap bat madanm ni lè lide l di l, epi aprè l mande padon, li achte flè, li mennen fi a soti elt… Jis pou l fè l konprann se pa t fòt li ki fè l te bat fi a. Men kounya, manman fi a menm, chak fwa pitit fi li pote l plent pou mouche a ki pa sispann leve men sou li a, ou konn kisa manman an reponn ? “Eben pitit, kisa w fè l menm ki fè l ap plede bat ou a? Lè konsa, ou konnen mesye a gen gwo san, se ou k pou poze w, mete w pi piti”. Repons manman an fèm ri wi, ou pa ta di se pitit li a ki antò nan bagay la, paske se li k pou mete l tou piti, anyen pa janm di pou mouche a li menm, kisa l dwe fè ? Anyen.

Se sou sa, m ta l fè ankèt la; e men kisa m te rive jwenn nan de twa jou… Kontinye li

LEVE!!!

Eske gen yon moun vre ki pa janm fè fas kare ak pwoblèm? Eske gen moun vre ki pa janm pran kou? M pa kwè non, m panse pèsonn pat tou rive, tout moun pa pase nan menm chimen men chak moun pase nan chimen glise pa l avan l rive.

obas

Eske w pare pou w glise, pare so, tonbe pou w ka leve. Malè pandje a se lè w twò prese a, sa ka fè w vann nanm ou pou w rive pi rapid, sa ka fè w met pye sou kou yon lòt pou w ka rive avan l, sa ka fè w fè chimen kwochi pouw rive tou elt. Epoutan, si w te konnen difikilte yo se yon pasaj ou oblije pran, ou pa t ap menm twò prese, ou pa t ap menm dekouraje. Pa gen pare kou san pran kou, si w pa swe ou pap konn valè sakrifis genyen.

Twò prese pa janm fè jou louvri, jan pawòl la di l la. Poukisa li enpòtan pou dakò pou w lite pou w ka rive amelyore lavi w? Bèl ti mizik sa a, pral ede w konn pouki… Kontinye li

ATIS MIZIK LAVI: JHENE AIKO

M pa sonje kòman mwen te fè dekouvri Jhené Aiko. Men sa m sonje e m pa p janm bliye, se sa li te fè m santi, premye fwa, mwen t ap tande mizik li. Lè m te vin kòmanse ap fè rechèch sou li, mwè li di nan yon entèvyou li t ap fè, li pa fè mizik pou vann, li pap vann tèt li, men li chante pou l ka libere tèt li. Pawòl sa a te frape m, e depi lè sa a, m tounen youn nan milyon fanatik li yo.

ja

Ann al dekouvri ansanm mizik Jhené, ki ka fè w santi w pi prè moun ou vle ye toutbon an… Kontinye li

KENBE POU W KENBE!

Jou solèy la pa leve yon kote, yo di tan an fèmen, tan an makawon. Ou ta di lavi a al pi dousman, ou gen lenpresyon pa gen lavi. Menm si n ap viv nan yon peyi twopikal kote solèy la prèske toujou la. Sikonstans lavi, pwoblèm sosyal ak politik nan peyi a ka ba w menm enpresyon an. Lè konsa, ou santi jou sa yo vin ak tristès , dèfwa menm parès tou. E ni mwen ni ou konnen kote parès ye, refleksyon pa met pye e gen risk dekourajman. Nou riske kite tan an mennen nou, nou riske bay vag sou rèv nou, sou lavi nou, nou riske bliye solèy nou. Tan an ka fèmen vre, men toujou gen demen, e lespwa a se ke solèy la ka releve.

BelO

Souvan, lè n gen pwoblèm olye n reflechi ak solisyon an, olye n kenbe ti kras branch lespwa nou rete a, nou pito ap pèdi yon pakèt tan nan marinen pwoblèm nan. E poutan si w wè sa, tout sa ki enpòtan an se kenbe. Wi kenbe la, menm lè pwoblèm nan te soti pou met pye sou kou w.

Pa lage, se yon pawòl ki pisan. Atis yo tèlman konn sa yo chante l, pou yo ka enspire w pou kontinye lite. Kite m pataje yon bèl ti mizik ak ou 2 atis Ayisyen chante bèl pawòl sa a… Kontinye li

Swiv zanmi’w Bèlnègès
Tumblr Logo
Fotochout/Konsepsyon BELNEGES
Belneges sou Youtube
Facebook