BELNEGES

AYITI NATIVES CO, POU TOUT BELNEGES!!!

-Ou se Bèl Nègès, kanmenm…

Se ak pawòl sa Caroline SADA, te resevwa m nan restoran l lan, Le Daily Gourmet Café, anba yon ti farinay lapli.

Si w ta wè fraz sa sonnen anglè, eben se pratik pale yon fanm ayisyèn ki viv, etidye e fè anpil tan ap travay Ozetazini nan domèn kosmetik, nan peyi Lond ak nan an pakèt lòt peyi anglofòn.

caroline Sada

Randevou a te kase pou 2 zè laprèmidi, m te tèlman vle rankontre moun ki fè bon ti lwil kokoye sa yo, ki fè ti po m dous pase vlou a, m rive avan lè.

Se te plezi pa Caroline tou. Ak yon bèl ti souri, li fè m santi, jan l anvi tout lòt bèl nègès yo, konnen e itilize pwodui Ayiti Natives Co yo. Caroline pa t bezwen pale m de pwodui sa yo, zansèt nou yo enspire l fè yo, pou m te konnen se yon travay li fè ak anpil lanmou.  Cheve l, zong li, po l, tèlman bèl, tout gentan pale pou li.

Nou te tèlman gen bagay pou nou di, avan menm li ofri m chèz, nou te gentan bò kontwa a, ki sèvi l kòm biwo, l ap montre m diferan pwodui Ayiti Natives yo, ki sou mache a deja ak sa ki nan laboratwa k ap teste.

Wi, nan peyi Dayiti, peyi pa nou an, genyen pwodui ki fèt a limaj nou, pwodui ki pou fè nou tounen Bèl Nègès… Kontinye li

YON BÈL TIFI… SE YON BÈL NÈGÈS

Lè jounalis yo, ap mande w kisa yon bèl nègès ye, kisa w ap di yo?

Sa, se te premye kesyon “Bo Nego” te poze m, lè pwojè BELNEGES la, te fenk kòmanse ap boujonnen nan lespri m.

Nan reflechi, nan fè rechèch sou sa ki yon “nègès” (istorikman, kiltirèlman, sosyolojikman) nan chèche mizik ki pou enspire m, jwenn yon definisyon klè e ki kenbe ak mouvman sa, m vin tonbe yon granm maten sou Twitter sou lyen sa a. Premye sa ki te atire atansyon m, se tit mizik sa a: BÈL TIFI…

talie1

Non sèlman li an kreyòl, men m santi menm kote a, m gen yon koneksyon ki fèt ak sa m pral tande a. Depi sou premye klik la, m te santi m deja jwenn repons ak tout preyokipasyon m.

Son gita nan kòmansman mizik la , anvayi tout lespri m. Pou yon moun ki travay anpil nan stidyo, premye nòt yo kaptive m, e yo banm yon premye enpresyon, yon travay fini. M kite l jwe, se gade m gade, m wè dwèt mwen p ap tape anyen sou klavye òdinatè a ankò. Ti son mizik la pote m ale. Kontinye li

PETET… SE IMAJ NOU!!!

Li pa yon sekrè pou pèsonn, koze al achte nan makèt la, se yon liks pou anpil  frè n ak sè n ayisyen. Anpil rezon sosyoekonomik ka esplike sa… Rezon sa yo pa fin twò enterese nou kounya, nou p ap mize tou sou yo.

Men, lè w rive anndan yon makèt, ou toujou gen santiman ou pi an sekirite pase lè w ap achte nan lari a.

Supermarket-Shopping-1

Ou pa gen moun k ap bourade w. Ou mwens enkyè, paske w santi w plis an sekirite. Epi, atik ki  anndan makèt yo, ranje pi byen pase sa ki nan mache yo. Mete sou sa, yo pa ekspoze nan solèy la, e gen plis chans pou w jwenn yon pi bon sèvis, pase lè w al achte  nan men yon machann nan lari a, osinon nan yon mache piblik, ki te ka joure w, si w ta ba l yon move pri.

Koze al achte nan makèt la, rive pi lwen menm. Gen moun, jis pou montre lòt moun, zafè yo ap byen mache, menm si yo konnen sa yo pral achte nan makèt la ap pi chè, yo pral  achte  nan makèt la kanmenm. Men, preyokipasyon m, poko janm sa…

Eske w konnen, obsèvasyon m kòm yon senp achtè, te pouse m al gade sa n ap achte nan makèt pa bò isit yo, èske se pou nou,  yo mete yo toutbon vre… Kontinye li

L.P.D: BEL TI ZANNO ALDO

Nan mwa oktòb ane pase, m rantre nan yon magazen ALDO ki Stanford, Connecticut (Ozetazini), depi nan pòt la, m gentan ap mande tèt mwen kot ti pankat wouj yo pase? Nou konnen deja, jan m renmen ti pankat wouj ki make “Sales”/”Clearance” ki vle di an kreyol “Likidasyon” yo.

Pa gen yon grenn ti pankat wouj anndan magazen an, m gentan tris. Men sa ki anndan an tèlman bèl, m di banm fè yon ti gade toujou… 5 minit aprè, se nan lari a mwè m ye… Yo tèlman vann chè, m pou m met deyo (lol).

aldo

Ou ka gen lide depi sou magazen yo gen  sou entènèt la, jan yo pa vann twò bon mache pase sa (http://bit.ly/Z7Nyku)

Gen anpil nan nou ki ka di, “O jan ALDO” pa vann chè”. Eben pou mwen yon ti chèn pou 35 dola ameriken, yon ti zanno pwen, pou 18 dola, gentan two chè pou mwen. Pa pran poz sezi w, m te gentan di w, m renmen bon piyay.

Se sak fè, lè m pantan sou machann Aldo sa, nan mache taba. M ret ak tout 32 m deyò (lol). M fè chay mwen (an mòd manman m).

Kontinye li

Swiv zanmi’w Bèlnègès
Tumblr Logo
Fotochout/Konsepsyon BELNEGES
Belneges sou Youtube
Facebook